[Beri’s Project - K] HONDA BEAT "起動摩打/士撻/起動馬達"維修 (ホンダ ビート セルモーター/スターターモーターの故障/修理)

-----------------------------------------------簡介編-----------------------------------------------

話說係2023年尾某一晚因有位Lovelive痛車同好換車(洪洪洪換更洪洪洪), 為了留念最後時光所以就決定出去同佢架車係街上合照

可惜影完之後上車發現著唔到, 只聽到汽油泵Relay既索Coil聲, 完全打唔著引擎起動摩打, 心諗今次碌柒了, 唔通要叫拖車?

好彩既係, 泊係我後面既貨VAN司機原來有玩80年代HONDA車, 佢當時知道我打唔著已經準備好鎚仔過來想幫我打打個起動摩打, 因為好多HONDA舊車都係因為起動摩打卡著, 令到索Coil推唔到起動摩打齒輪到引擎飛輪中

可惜因為BEAT仔係中置引擎, 加上起動摩打係車底之中, 要用鎚仔敲擊根本係沒可能既事, 正因為BEAT仔只有棍波版本, 所以好處就係可以入定1波再踩離合器(極力子)然後推車再彈離合器(極力子)強行著車

BEAT仔引擎只有656cc容量, 所以只係推左不足2米就可以強行著車, 只靠一個男人就推到, 可見連人只有約800KG既車係幾方便

為左唔好係路途中再次死火, 起步都比平時呼得多油, 好彩既係沿路無塞車同等紅燈, 15分鐘唔夠就返到停車場了

-----------------------------------------------維修編-----------------------------------------------

因於係強行推著車, 令到ECU無左STARTER Feedback信號, 所以Engine燈會長著

未維修前, 完全無反應

返到停車場後, 首先要升起車尾部分, 升到夠我插入車底就OK (升起後記得要放櫈仔)

首先檢查有無12V電壓比起動摩打既索Coil, 著車匙發現電阻值正常, 插返電池度都足13.*V

初步檢查完唔關控制線路問題, 所以下一步就直接從車底拆走起動摩打出來進行檢查/翻新

從外觀上可睇到應該是由1991年出廠一直用到2023年, 所以難免會有問題(32年啦大佬)

順便睇下引擎飛輪齒位, 沒異常花痕/爆牙, 所以唔關帶唔到飛輪事

先量度索Coil, Coil線圈內阻阻值正常(14ohm左右, 因DMM+線有1.8ohm內阻)

檢查碳刷長度, 仲有超過一半長度, 然後碳刷都沒卡既情況, 檢查OK

因為只有著車時先用到, 所以比其他位置既摩打碳刷(例如車窗/雨刮)消耗得比較少都正常的

開始打散!

然後打散摩打, 由於摩打係靠外殼做負極

所以有d接觸位因長期通過大電流從而變黑, 要打磨一下

摩打轉子銅頭都有氧化情況, 要打磨一下

轉子線圈正常

定子線圈內阻都正常

然後螺絲固定位都要打磨一下, 因為電流就係靠螺絲固定位導通返去電池

檢查索Coil帶動桿, 正常沒有爛和卡住

最後清走入面舊灰塵和碳粉, 然後在主軸補回摩打潤滑油, 合體就保養/修理完成!

裝返上車, 起動摩打表面就唔翻新了, 係車底位置都睇唔到

果然裝回返去車後, 一打車匙就馬上著到車

維修後影片

確認係摩打內部接觸不良引致摩打唔轉🙈😞